نیپال میں ایک سیاحتی تقریب کے دوران ایک دھماکے کے نتیجے میں نائب وزیر اعظم بشنو پاوڈیل اور میئر دھنراج آچاریہ جھلس کر زخمی ہو گئے۔
اس دھماکے میں دونوں حکام سمیت کئی قریب کھڑے دیگر افراد زخمی ہو گئے۔ مسٹر پاوڈیل اور مسٹر آچاریہ کو طبی علاج کے لیے فوری طور پر ایئر ایمبولینس کے ذریعے کٹھمنڈو منتقل کر دیا گیا۔
نائب وزیر اعظم اور وزیر خزانہ بشنو پاوڈیل پاوڈیل کے ہاتھ اور چہرہ جھلس گیا۔ انہیں کیرتی پور برن اسپتال کٹھمنڈو میں داخل کرلیا گیا ہے جبکہ میئر آچاریہ کے چہرے پر جھلسنے کے زخم آئےہیں۔
واقعے کے بعد نیپالی حکام نے انڈین شہری کملیش کمار کو وزٹ پوکھرا ایئر 2025 کی افتتاحی تقریب میں ہونے والے دھماکے کے سلسلے میں گرفتار کیا ہے۔
یہ واقعہ 15 فروری کو اس وقت پیش آیا جب مسٹر پاوڈیل اور مسٹر آچاریہ نے بجلی کے سوئچ کے ذریعے شمع روشن کرتے ہوئے غبارے فضا میں چھوڑے، جس سے دھماکہ ہو گیا۔
پولیس نے تصدیق کی کہ 41 سالہ کملیش کمار ان غباروں میں گیس بھرنے کا کام کر رہے تھے، جو بعد میں آگ پکڑ کر دھماکے سے پھٹ گئے۔
ڈپٹی سپرنٹنڈنٹ آف پولیس نے بتایا کہ مسٹر کمار کے خلاف کاشکی ڈسٹرکٹ کورٹ میں مقدمہ درج کر لیا گیا ہے۔ اس واقعے کے بعد نیپال کے وزیر داخلہ رمیش لیکھک نے ایک تحقیقاتی کمیٹی قائم کی ہے، جو دھماکے کی وجوہات اور حفاظتی اقدامات میں کسی ممکنہ کوتاہی کا جائزہ لے گی۔
