پاکستان کے نگراں وزیر اعظم انوار الحق کاکڑ نے انٹر سروسز انٹیلی جینس (آئی ایس آئی) کے سربراہ لیفٹیننٹ جنرل ندیم انجم کی مدت ملازمت میں توسیع کی تصدیق کردی ہے
وزیر اعظم انوار الحق کاکڑ نے عرب نیوز کو دیے گئے انٹرویو میں کہا آئی ایس آئی کے سربراہ لیفٹیننٹ جنرل ندیم انجم کی مدت ملازمت میں توسیع پالیسی کے تسلسل کے لیے دی ہے
انوار الحق کاکڑ کا کہناتھا کہ لیفٹیننٹ جنرل ندیم انجم کی مدت ملازمت میں توسیع ریاست کی صوابدید ہے اور اس میں کوئی خلاف معمول بات نہیں ہے۔
انٹیلی جینس چیف کی مدت ملازمت میں توسیع کے حوالے سے کئی ہفتوں سے خبریں گردش کررہیں تھیں تاہم حکومت یا فوج کی جانب سے اس کی تصدیق یا تردید نہیں کی گئی تھی۔
یہ پہلی مرتبہ ہے کہ حکومت نے براہ راست تصدیق کی ہے کہ ڈائریکٹر جنرل آئی ایس آئی ندیم انجم کی مدت ملازمت میں توسیع کردی گئی ہے۔
گزشتہ سال نومبر میں آئی ایس آئی کے سربراہ تعینات ہونے والے لیفٹیننٹ جنرل ندیم انجم کو ستمبر کے آخر میں ریٹائر ہونا تھا۔ تاہم یہ واضح نہیں ہے کہ ان کی مدت ملازمت میں کتنا اضافہ کیا گیا ہے۔
ندیم انجم کو لیفٹیننٹ جنرل کی حیثیت سے توسیع دی گئی ہے اور وہ آئی ایس آئی کے سربراہ کے طور پر کام کرتے رہیں گے۔
