امریکہ کے نو منتخب صدر ڈونلڈ ٹرمپ نے اپنے سابق دور کے قائم مقام امیگریشن چیف تھامس ہومن کا “بارڈر زار” یعنی نگران اعلیٰ کے طور پر انتخاب کیا ہے
ٹرمپ نے اپنے سوشل میڈیا پلیٹ فارم “ٹروتھ” پر پوسٹ کیا کہ 62 سالہ ہومن جنوب میں میکسیکو اور شمال میں کینیڈا تک کے “ہماری قوم کی سرحدوں کے انچارج” ہوں گے۔
انہوں نے مزید کہا کہ انہیں اس بارے “کوئی شک نہیں” کہ ہومن “ایک شاندار” کام انجام دیں گے جس کا طویل عرصے سے انتظار کیا جا رہا ہے۔
نو منتخب صدر نے لکھا، “میں ٹام کو ایک طویل عرصے سے جانتا ہوں، اور ہماری سرحدوں پر پولیسنگ اور کنٹرول کرنے میں ان سے بہتر کوئی نہیں ہے۔
ٹرمپ امیگریشن پر سخت موقف رکھنے والے اسٹیفن ملر کو پالیسی کے ڈپٹی چیف آف اسٹاف کے طور پر بھی مقرر کرنے والے ہیں۔
نائب صدر منتخب جے ڈی وینس نے ملر کے ٹرمپ کی نئی انتظامیہ میں شمولیت کا خیر مقدم کیا ہے۔
انہوں نے اسے صدر کا “ایک اور شاندار انتخاب” قرار دیا۔
ہومن کی بطور “بارڈر زار” تقرری کے لیے سینیٹ کی توثیق کی ضرورت نہیں ہے۔
ہومن ایک سابق پولیس افسر اور بارڈر پیٹرول ایجنٹ ہیں۔
ٹرمپ کی جنوری 2017 سے جون 2018 تک پہلی صدارتی مدت کے دوران ہومن نے”یو ایس امیگریشن اینڈ کسٹمز انفورسمنٹ”، یا “آئس” کے قائم مقام ڈائریکٹر کے طور پر خدمات انجام دی تھیں۔
