محمد بن سلمان اور ڈونلڈ ٹرمپ سے شامی صدر احمد الشارع کی ملاقات

امریکی صدر ڈونلڈ ٹرمپ اور سعودی ولی عہد شہزادہ محمد بن سلمان نے بدھ کے روز ریاض میں شام کے صدر احمد الشارع سے ملاقات کی۔

یہ ملاقات سعودی ولی عہد شہزادہ محمد بن سلمان کی درخواست پر ڈونلڈ ٹرمپ کے شامی حکومت پر سے تمام پابندیاں اٹھانے کے اعلان کے بعد ہو رہی ہے۔

وائٹ ہاؤس کے مطابق ٹرمپ نے قطر جانے سے پہلے احمد الشارع کو ’ہیلو ‘کہنے پر رضامندی ظاہر کی۔

ٹرمپ نے کہا کہ وہ سعودی ولی عہد شہزادہ محمد بن سلمان اور ترک صدر رجب طیب اردگان کی طرف سے حوصلہ افزائی کے بعد الشارع سے ملاقات پر رضامند ہوئے۔

واضح رہے کہ صدر نے شام پر برسوں سے عائد پابندیاں ہٹانے کا بھی اعلان کیا تھا۔

اس حوالے سے ڈونلڈ ٹرمپ کا کہنا تھا کہ شام میں ایک نئی حکومت ہے جو امید ہے کہ ملک کو مستحکم کرنے اور امن قائم کرنے میں کامیاب ہوگی۔