امریکی صدر ڈونلڈ ٹرمپ نے ایلون مسک کی کمپنی ٹیسلا کی ایک چمکدار سُرخ رنگ کی گاڑی سیڈان خریدی ہے جو ان کی الیکٹرک وہیکل کمپنی کے لیے حمایت کو ظاہر کرتی ہے۔
صدر ٹرمپ کے سیاسی ایجنڈے کو آگے بڑھانے اور حکومتی اخراجات میں کمی کے اقدامات کی وجہ سے ایلون مسک کی اپنی کمپنی کو دھچکا لگا ہے۔
ڈونلڈ ٹرمپ نے ڈرائیونگ سیٹ سنبھالتے ہوئے کہا کہ ’واہ۔ یہ خوبصورت ہے۔ یہ ایک بہت اچھی پروڈکٹ ہے۔ ‘
امریکی صدر نے بتایا کہ انہوں نے یہ گاڑی بغیر کسی رعایت کے پوری قیمت پر خریدی ہے جس کی مالیت تقریباً 80,000 ڈالر ہے۔
انہوں نے کہا کہ ’مسک مجھے ڈسکاؤنٹ دے دیتے لیکن اگر میں رعایت لیتا تو انہوں نے کہنا تھا کہ اوہ، میں فائدے لے رہا ہوں۔‘
صدر ٹرمپ نے کہا کہ ’جب میں نے دیکھا کہ کیا ہو رہا ہے، میں نے کہا کہ میں ٹیسلا خریدنا چاہتا ہوں، اور ہم چلے گئے۔ ان (ایلون مسک) کے پاس چار خوبصورت گاڑیاں تھیں اور میں نے میڈیا کے سامنے ایک خرید لی۔ یہ ایک بہت ہی عوامی خریداری تھی۔‘
ان کا کہنا تھا کہ ’وہ (گاڑیاں) خوبصورت ہیں اور بہتر کام کرتی ہیں۔‘
ایلون مسک کو ’محب وطن‘ قرار دیتے ہوئے امریکی صدر نے کہا کہ ’انہوں نے بہت اچھا کام کیا ہے۔ ایسا نہیں ہے کہ وہ ریپبلکن ہیں۔ کبھی کبھی، مجھے یہ بھی یقین نہیں ہوتا کہ وہ اپنے فلسفے کے لحاظ سے کیا ہیں، لیکن وہ ایک عظیم شخص ہیں۔‘
امریکی صدر ڈونلڈ ٹرمپ نے سوشل میڈیا پر اعلان کیا تھا کہ وہ ایلون مسک کی حمایت میں نئی برینڈڈ ٹیسلا گاڑی خریدیں گے۔
صدر ٹرمپ نے کہا کہ اپنے ڈونر اور قریبی ایڈوائزر ایلون مسک کی حمایت کے طور پر ٹیسلا گاڑی خریدوں گا، ایلون مسک امریکی قوم کے لیے بہترین خدمات کررہے ہیں۔
ان کا کہنا تھا کہ وہ الیکٹرک کار فرم ٹیسلا کے حصص میں 15 فیصد سے زیادہ کمی کے بعد ’ایک نئی برینڈڈ ٹیسلا گاڑی خریدیں گے۔‘
