ٹرمپ کا ہیرس کے ساتھ ایک اور مباحثے سے انکار

سابق امریکی صدر ڈونلڈ ٹرمپ نے صدارتی انتخابات سے قبل نائب صدر کاملا ہیرس کے ساتھ ایک اور مباحثے کے چیلنج کو مسترد کر دیا ہے۔

ڈیموکریٹک امیدوار کاملا ہیرس کی انتخابی مہم نے کہا تھا کہ وہ 23 اکتوبر کو سی این این پر ریپبلکن کے امیدوار کے ساتھ ایک اور صدارتی مباحثہ کرنے کے لیے تیار ہیں۔

کاملا ہیرس کے انتخابی مہم کی سربراہ جین او میلے ڈیلون نے ایک بیان میں کہا کہ نائب صد نے 23 اکتور کو ہونے والے مباحثے کی دعوت قبول کر لی ہے۔ ڈونلڈ ٹرمپ کو اس صدارتی مباحثے کے لیے کوئی دشواری نہیں ہونی چاہیے۔

ڈونلڈ ٹرمپ اپنے پرانے موقف پر قائم ہیں کہ پانچ نومبر کو ہونے والے انتخابات سے قبل کوئی اور صدارتی مباحثہ نہیں ہو گا۔

شمالی کیرولینا میں ایک ریلی سے خطاب میں سابق صدر نے کہا کہ ایک اور صدارتی مباحثہ کرنے میں مسئلہ یہ ہے کہ اب بہت دیر ہو چکی ہے۔ ووٹنگ شروع ہو چکی ہے۔

11 ستمبر کو ڈونلڈ ٹرمپ اور کاملا ہیرس کے درمیان پہلا صدارتی مباحثہ فلاڈیلفیا میں ہوا تھا جو 90 منٹ تک جاری رہا تھا۔

نائب صدارتی امیدواروں ٹِم والز اور جے ڈی وینس کے درمیان مباحثہ یکم اکتوبر کو ہو گا۔