اسرائیل کے دارالحکومت تل ابیب میں ٹرک ڈرائیور نے موساد کے ہیڈ کوارٹرز کے قریب بس اسٹاپ پر کھڑے اسرائیلیوں کو روند ڈالا۔
اسرائیلی حکام کے مطابق واقعے میں ایک شخص ہلاک اور کم از کم 32 افراد زخمی ہوئے۔زخمیوں میں سے 5 کی حالت تشویشناک بتائی جارہی ہے۔
واقعہ گیلات فوجی اڈے کے قریب پیش آیا ہے جس میں اسرائیلی خفیہ تنظیم ’موساد‘ کا ہیڈکوارٹر بھی واقع ہے۔
اسرائیلی ایمرجنسی سروس اور پولیس کا کہنا ہے کہ اتوار کو شمال تل ابیب کے تجارتی مرکز میں واقع بس اسٹاپ پر کھڑے افراد پر ایک ڈرائیور نے ٹرک چڑھادیا۔ پولیس نے فوری طور پر اس بات کی تصدیق نہیں کی آیا یہ واقعہ حادثہ ہے یا حملے کا شاخسانہ ہے۔
سکیورٹی حکام اس واقعے کو ایک دہشتگرد حملے کے طور پر دیکھ رہے ہیں جبکہ مشتبہ ٹرک ڈرائیور کو بھی پولیس نے ہلاک کر دیا ہے۔
اسرائیلی طبی سروس نے ایک بیان میں کہا ہے کہ طبی عملے نے درجنوں افراد کو طبی امداد فراہم کی ہے، الجزیرہ کے مطابق واقعے میں 6 افراد شدید زخمی ہوگئے جبکہ 7 کو درمیانی درجے اور 20 کو معمولی چوٹیں آئی ہیں۔
واضح رہے کہ واقعہ ایسے وقت پیش آیا ہے جب عبرانی کیلنڈر کے مطابق گزشتہ سال 7 اکتوبر کو حماس کے اسرائیل پر کیے گئے حملے کی پہلی برسی منائی جارہی تھی۔
۔
