امریکی وزارت خارجہ کی اردو کی ترجمان مارگریٹ میکلاؤڈ نے کہا ہے کہ پاکستانیوں پر امریکہ میں داخلے پر پابندی سے متعلق ابھی کوئی فیصلہ نہیں ہوا۔
مارگریٹ میکلاؤڈ کا کہناتھاکہ صدر ٹرمپ نے 20 جنوری کو صدارتی حکم نامہ جاری کیا ہے جس کے تحت ویزا پروگرام پر ازسرنو نظرثانی کی جائے گی۔
انہوں نے کہا کہ فیصلے کا مقصد امریکہ کو غیرملکی دہشت گردوں سے محفوظ رکھنا ہے، ویزا پابندیوں کیلئے مختلف ملکوں سے متعلق معلومات کا تبادلہ کیا جارہا ہے۔
مارگریٹ میکلاؤڈ کا کہناتھاکہ صدر ٹرمپ نے اسٹیٹ یونین سے خطاب میں پاکستان کے تعاون کو سراہا تھا، امریکہ میں آباد پاکستانی معاشرے کا اہم حصہ ہیں۔
ان کاکہناتھاکہ امریکہ میں داخلے کی درخواست دینا ہو تو درخواست دہندہ کو تمام باتیں درست بتانی چاہئیں، غیر قانونی طور پر امریکہ میں داخلے کی صورت میں سزا ملے گی۔
خیال رہے کہ امریکی میمو یا آرڈر میں 41 ممالک کے شہریوں پر ویزا پابندیاں لگ سکتی ہیں۔
