پاکستان میں غیرت کے نام پر بھائی نے اپنے ہاتھوں سے گلہ گھونٹ کر بہن کو موت کے گھاٹ اتار دیا۔
یہ دلخراش واقعہ پاکستان کے سب سے بڑے صوبے پنجاب کے شہر ٹوبہ ٹیک سنگھ میں پیش آیا
ٹوبہ ٹیک سنگھ کے گاؤں آلو وال میں ماریہ کو بھائی فیصل اور باپ عبدالستار کے ہاتھوں انسانیت سوز مظالم کا بھی سامنا کرنا پڑا، جس کی ویڈیو وائرل ہوگئی۔
وائرل ویڈیو میں دیکھا جاسکتا ہے ملزم نے تین منت تک بہن کے منہ پر تکیہ رکھا۔ کمرے میں باپ اور گھر کے دیگر افراد بھی موجود تھے۔ کسی نے ماریہ کی مدد تک نہیں کی
وائرل وڈیو میں نظر آرہا ہے کہ قتل کی واردات کے بعد باپ نے اپنے قاتل بیٹے کو پانی بھی پلایا
پولیس کے مطابق واقعہ 17 اور 18 مارچ کی درمیانی شب ٹوبہ ٹیک سنگھ کے نواحی گاؤں 277 ج ب میں پیش آیا تھا جہاں ملزمان نےاس قتل کے بعد خاموشی سے رات کو ہی مقتولہ ماریہ کی تدفین بھی کردی تھی۔
ویڈیو سامنے آنے کے بعد پولیس نے مقدمہ درج کرتے ہوئے مقتولہ کی قبرکشائی کی تھی جس کے بعد فرانزک کے لیے نمونے لیے گئے۔
ماریہ کے بھائی شہباز اور بھابھی سمیرا نے ملزمان فیصل اور عبدالستار پر لڑکی سے زیادتی کا الزام عائد کردیا۔
سمیرا نامی خاتون قتل کے وقت بنائی جانے والی ویڈیو میں بھی نظر آرہی تھیں، جبکہ قتل کی ویڈیو بنانے والا شہباز ہے۔
بھائی شہباز کا کہناتھا کہ میں نے کال کرنے کے بہانے قتل کی واردارت کی ویڈیو بنائی ، قتل کے وقت مقتولہ کے ساتھ میری بیٹی سورہی تھی ، میں نے بہن کی جان بخشی کیلئے منتیں کیں لیکن بھائی اور باپ نہیں مانے
مقتولہ ماریہ کے بھائی شہباز نے الزام لگایا کہ پولیس درخواست کے باوجود مدعی نہیں بنا رہی۔
مقتولہ کی بھابھی نے اپنے بیان میں انکشاف کیاکہ مقتولہ ماریہ کا باپ اور اس کا بھائی اسے زیادتی کا نشانہ بناتے تھے ، ہمارے بچے ملزمان کے قبضے میں تھے منع کرنے پر ان کو مارنے کی دھمکی دی ۔
یاد رہے کہ گزشتہ روز سے پاکستان کے سوشل میڈیا پر ایک وڈیو وائرل ہے جس میں بھائی نے اپنے باپ اور دیگر افراد کی موجودگی میں اپنی 22 سالہ بہن ماریہ کو منہ پر تکیہ رکھ کر قتل کررہا ہے۔
