بنگلہ دیش نے پاکستان کے ساتھ 50 برس بعد براہ راست دوطرفہ تجارت بحال کردی ہے
پاکستان رائس ایکسپورٹر ایسوسی ایشن کے قائم مقام چیئرمین جاوید جیلانی نے بتایا کہ پاکستان اور بنگلہ دیش کے درمیان سرکاری سطح پر چاول کا پہلا کارگو پورٹ قاسم سے روانہ ہوگیا ہے۔
جاوید جیلانی نے بتایا کہ پی این ایس سی جہاز سبی کے ذریعے 26 ہزار 250 ٹن چاول بھیجا گیا ہے، پاکستانی جہاز 4مارچ کو بنگلا دیش پہنچے گا۔
رائس ایکسپورٹرز کے مطابق ٹی سی پی کے ذریعے50ہزار ٹن اری چاول کا معاہدہ فروری کے پہلے ہفتےمیں ہوا تھا، چاول کی دوسری شپمنٹ مارچ کے پہلے ہفتے میں بنگلادیش روانہ ہو گی۔
دوسری شپمنٹ میں23 ہزار 750 ٹن چاول بھیجے جائیں گے، ٹی سی پی نے50ہزار ٹن چاول کا ایک اور ٹینڈرجاری کردیا ہے، چاول کے مزید سودوں کے حوالے سے بھی خوشخبری جلد دیں گے۔
گذشتہ برس اگست میں شیخ حسینہ واجد کی حکومت کے خاتمے کے بعد دونوں ممالک کے درمیان تعلقات میں تلخی کم ہونا شروع ہوئی ہے۔
بنگلہ دیش کی عبوری حکومت کے سربراہ ڈاکٹر محمد یونس نے پاکستان کے وزیراعظم شہباز شریف کے ساتھ دو ملاقاتیں کی ہیں۔
حسینہ واجد کے 15 سالہ اقتدار میں پاکستان کے ساتھ تعلقات میں تناؤ اور انڈیا کی طرف جھکاؤ رہا۔
طلبا تحریک کے نتیجے میں حکومت ختم ہونے کے بعد حسینہ واجد انڈیا فرار ہو گئیں جس کے بعد انڈیا اور بنگلہ دیش کے تعلقات میں سرد مہری آئی۔
