پاکستان تحریکِ انصاف نے سپریم کورٹ کے حالیہ فیصلے کی روشنی میں پارٹی میں شامل ہونے والے قومی اسمبلی کے 37 آزاد اراکین کے نام آج ہی الیکشن کمیشن کو فراہم کرنے کا اعلان کیا ہے۔
چیئرمین پی ٹی آئی بیرسٹر گوہر علی خان نے جمعرات کو پارلیمنٹ ہاؤس کے باہر میڈیا سے بات کرتے ہوئے مطالبہ کیا ہے کہ الیکشن کمیشن فوری طور پر پی ٹی آئی اراکین کے نوٹی فکیشن جاری کرے۔
سپریم کورٹ نے 12 جولائی کو مخصوص نشستوں سے متعلق اپنے فیصلے میں قرار دیا تھا کہ قومی اسمبلی کے 41 اراکین اپنی پارٹی وابستگی سے متعلق 15 روز میں حلف نامے جمع کرائیں۔
پی ٹی آئی کا دعویٰ ہے کہ تمام 41 ارکان سے پارٹی میں شمولیت کے حلف نامے لے لیے گئے ہیں جن میں سے 37 کی تصدیق آج الیکشن کمیشن میں کر دی جائے گی۔
سپریم کورٹ کے فیصلے پر مشاورت کے لیے جمعرات کو پارلیمنٹ ہاؤس میں پی ٹی آئی اور سنی اتحاد کونسل کے پارلیمانی رہنماؤں کا مشترکہ اجلاس ہوا جس میں سپریم کورٹ کے فیصلے اور آئندہ کی حکمتِ عملی پر تبادلۂ خیال کیا گیا۔
دوسری جانب حکمراں جماعت پاکستان مسلم لیگ (ن) نے مخصوص نشستوں سے متعلق فیصلے پر تنقید کرتے ہوئے عدالت سے نظرِ ثانی کی اپیل کی ہے۔
سپریم کورٹ کے مخصوص نشستوں سے متعلق احکامات پر عمل درآمد کے لیے الیکشن کمیشن کا اجلاس بھی جمعرات کو ہونا ہے۔
اجلاس میں سیکریٹری الیکشن کمیشن اور قانونی ٹیم حکام کو بریفنگ دے دی جب کہ اعلیٰ عدالت کے فیصلے کی روشنی میں اُس پر عمل درآمد کے مختلف پہلوؤں پر بھی غور کیا جائے گا۔
