چین کے بیشترعلاقے اس وقت شدید سردی کی لپیٹ میں ہیں۔ چالیس سال میں سردی کی شدید ترین لہر شنگھائی پہنچ گئی ہے۔
رگوں میں خون منجمد کردینے والی سردی سے عوام بے حد پریشان ہیں۔ ایک ہفتے سے جاری سردی کی لہر نے اب غیر معمولی شدت اختیار کی ہے۔ لاکھوں افراد گھروں تک محدودو ہوکر رہ گئے ہیں۔
شنگھائی میں شدید سردی کے باعث کاروباری سرگرمیاں معطل ہوکر رہ گئی ہیں۔ اس کے نتیجے میں ملک بھر میں اور بیرون ملک کاروباری معاملات بری طرح متاثر ہوئے ہیں۔
جمعرات کو شنگھائی کے نواح میں کم ترین درجہ حرارت منفی 4 تا 6 سینٹی گریڈ جبکہ شہرکے اندرونی علاقوں میں صفر سے تھوڑا نیچے رہا۔
سائبیریا سے آنے والی یخ بستہ ہوائوں کے باعث شمالی چین کے بعض صوبوں میں متعدد شہروں کا درجہ حرارت منفی 30 تک گرچکا ہے۔ مقامی حکومتیں عوام کو زیادہ سے زیادہ راحت پہنچانے کے لیے خصوصی اقدامات کر رہی ہیں۔
