افغان دارالحکومت کابل میں ایک ہفتے کے دوران تیسرا بم دھماکہ ہوا، جس میں 2 افراد ہلاک اور 12 زخمی ہوگئے۔
کابل پولیس کے ترجمان خالد زادران کا کہنا ہے کہ گرینیڈ کا دھماکا دشت برچی کے علاقے میں تجارتی مرکز کے باہر ہوا، اس علاقے میں ہزارہ برادری کی اکثریت ہے۔
زادران نے بتایا کہ ابتدائی معلومات کے مطابق دھماکے میں دو افراد ہلاک اور 12 زخمی ہوئے ہیں۔
ایک ہفتے کے دوران یہ افغان دارالحکومت میں تیسرا بم دھماکا ہے، اس سے قبل ہونیوالے دھماکوں میں 10 افراد ہلاک اور متعدد زخمی ہوئے تھے۔
رپورٹ کے مطابق ایک ہفتے کے دوران اس علاقے میں یہ دوسرا خوفناک دھماکا ہے، اس سے قبل ہفتہ کو ایک بس میں نصب بم کے دھماکے میں 5 افراد ہلاک اور 15 زخمی ہوئے تھے، جس کی ذمہ داری اسلامک اسٹیٹ (آئی ایس) نے قبول کی تھی۔
کابل کے مشرقی علاقے میں اس کے اگلے روز ہونیوالے دھماکے میں 3 افراد ہلاک اور 4 زخمی ہوئے تھے، بم منی وین کے قریب ٹھیلے میں چھپایا گیا تھا۔
