پاکستان کے سب سے بڑے شہر کراچی میں پولیس اہلکاروں نے ایک ٹریفک حادثے کی فوٹیج بنانے پر نیوز ورلڈ امریکہ کے نمائندہ خصؤصی سید تابش کفیلی پر بدترین تشدد کیا۔ تابش کفیلی کو نہ صرف حراست میں لیا گیا، بلکہ ان پر جسمانی تشدد بھی کیا گیا۔
تفصیلات کے مطابق نارتھ کراچی میں ایک تیز رفتار ڈمپر نے موٹرسائیکلوں کو کچل دیا، جس کے بعد جائے حادثہ پر شہریوں کی بڑی تعداد جمع ہو گئی۔ موقع سے گزرنے والے رپورٹر سید تابش کفیلی نے حالات کی سنگینی دیکھتے ہوئے فوٹیج بنانا شروع کی، جو بظاہر پولیس کو ناگوار گزرا۔
تفصیلات کے مطابق ایک سادہ لباس میں ملبوس شخص نے تابش کفیلی سے موبائل فون چھیننے کی کوشش کی، جس کے بعد سادہ لباس اور وردی میں ملبوس اہلکاروں نے تابش پر تشدد شروع کر دیا۔ رپورٹر نے بارہا اپنی شناخت کرائی اور بتایا کہ وہ میڈیا سے وابستہ ہیں، مگر اہلکاروں نے کوئی بات سنے بغیر ان پر تھپڑوں اور مکوں کی بارش کر دی۔
اہلکاروں نے تابش کو پولیس موبائل میں ڈال کر سرسید تھانے منتقل کیا ، جہاں راستے بھر صحافی کو بدترین تشدد کا سامنا کرنا پڑا۔
