ملائیشیا کی پولیس نے کہا ہے کہ دارالحکومت کوالالمپور کے جلان امپانگ روڈ پر واقع ہوٹل سے ایک اسرائیلی شہری کو گرفتارکر لیا گیا جس کے بارے میں شبہ ہے کہ وہ اسرائیل کے خفیہ ادارے کا ایجنٹ ہے۔
پولیس کے مطابق ملزم سے گرفتاری کے وقت چھ پستول اور دو سو گولیاں ملیں۔ تین پستولوں میں پوری گولیاں موجود تھیں۔
انسپکٹر جنرل آف پولیس سری رضاالدین حسین نے کہا کہ پولیس کو شبہ ہے کہ ملزم اسرائیل کے خفیہ ادارے کا ایجنٹ ہے۔ انہوں نے کہا کہ ’فلسطین اسرائیل صورت حال کے پیش نظر ہمیں سلامتی کے معاملے میں محتاط رہنے کی ضرورت ہے۔‘
انسپکٹر جنرل آف پولیس سری رضا الدین حسین نے صحافیوں کو بتایا کہ 36 سالہ ملزم فرانسیسی پاسپورٹ پر متحدہ عرب امارات سے 12 مارچ کو ملائیشیا میں داخل ہوا تھا۔
رضا الدین کے خیال میں ملزم نے کرپٹو کرنسی کے ذریعے ملائیشیا میں اسلحہ خریدا۔ پولیس نے اس امکان کو مسترد نہیں کیا کہ ملزم کا ملک میں نیٹ ورک موجود ہے۔
انہوں نے بتایا کہ ملزم کو ریمانڈ پر 31 مارچ تک قانون نافذ کرنے والے ادارے کی تحویل میں دے دیا گیا۔
ابتدائی تحقیقات سے پتہ چلتا ہے کہ ملزم نے، جن کے پاس اسرائیلی پاسپورٹ بھی ہے، دعویٰ کیا کہ وہ خاندانی جھگڑے کی بنیاد پر ایک اسرائیلی شہری کو تلاش کر کے قتل کرنے کی نیت سے ملائیشیا پہنچا ہے۔
پولیس کے مطابق شاہ ملائیشیا سلطان ابراہیم اور وزیر اعظم داتو سری انور ابراہیم کی سکیورٹی میں اضافہ کر دیا گیا ہے۔
