امریکہ کے شہر کینساس میں مقامی فٹ بال ٹیم چیفس کے سپر بول ٹرافی جیتنے کے جشن کی ایک پریڈ کے دوران فائرنگ سے ایک شخص ہلاک اور کم از کم دس زخمی ہو گئے ہیں۔
سپر بول کا ٹائیٹل جیتنے کی تقریب میں فائرنگ کے فوراً بعد متعدد شائقین اسٹریچرز پر لے جاتے ہوئے دیکھے گئے تھے۔
پولیس نے کہا ہے کہ تین افراد کو حراست میں لیا گیا ہے۔
اعلیٰ حکام کا کہنا ہے کہ فائرنگ کے نتیجے میں 21 زخمی ہونے والے افراد میں زیادہ تر کی حالت خطرے میں ہے جبکہ زخمیوں میں شامل 9 بچوں کی حالت خطرے سے باہر ہے۔
فائرنگ کینساس سٹی کے مرکز میں واقع ٹرین اسٹیشن کے قریب کی گئی جہاں ہزاروں شائقین سپر باؤل فتح کے جشن میں نکالی گئی پریڈ دیکھنے کے لیے جمع تھے۔
فائرنگ کے وقت کینساس سٹی چیفس کے کھلاڑی بھی اسٹیج پر موجود تھے، فائرنگ شروع ہوتے ہی پریڈ دیکھنے والا ہجوم، میئر اور ان کے خاندان سمیت دیگر افراد کو جان بچانے کیلئے وہاں سے بھاگنا پڑا۔
کینساس سٹی کے پولیس چیف اسٹیسی گریوز نے بتایا کہ فائرنگ کے فوری بعد پولیس حکام نے جوابی کارروائی کی اور جائے وقوعہ پر موجود مشتبہ افراد سے تحقیقات شروع کر دیں۔
حکام نے بتایا کہ فائرنگ کے وقت پریڈ کی نگرانی کیلئے 800 سے زیادہ پولیس اہلکار اور فائر ڈپارٹمنٹ جائے وقوعہ پر موجود تھا۔
