برطانیہ کی فضا اور پانیوں پر روس کا خطرہ منڈلا رہا ہے: برطانوی وزیرِ اعظم

برطانیہ کے ایوانِ نمائندگان ہاؤس آف کامنز میں بات کرتے ہوئے وزیرِ اعظم کیئر اسٹارمر نے کہا ہے کہ روس ایک ایسا ’سنگین خطرہ‘ ہے جو برطانیہ کے پانیوں اور آسمانوں میں منڈلا رہا ہے۔

انھوں نے کہا کہ روس کی جانب سے این ایچ ایس پر سائبر حملے بھی کیے گئے ہیں اور ہماری گلیوں میں لوگوں کو قتل کرنے کی بھی کوشش کی ۔

کیئر اسٹارمر نے کہا ’میں سمجھتا ہوں کہ یوکرین کا مستقبل برطانیہ کی قومی سلامتی کے لیے نہایت اہم ہے۔

اسٹارمر نے کہا کہ ’ہم یوکرین کے ساتھ کھڑے ہیں کیونکہ یہی درست فیصلہ ہے اور یہ ہمارے ملک کے مفاد میں بھی ہے۔‘

وزیرِ اعظم کا مزید کہنا تھا کہ ’دیرپا امن، مضبوط امن اور عدل کی بنیاد پر حاصل ہونے والا امن ہمارا مقصد ہے۔‘ انھوں نے کہا کہ برطانیہ ایک امن معاہدہ حاصل کرنے کے لیے ’فرنٹ سے لیڈ‘ کرے گا۔