یمن کے ساحل پر تارکین وطن کی کشتی ڈوبنے سے 39 افراد ہلاک، 100 لاپتہ

یمن کے ساحل پر کشتی ڈوبنے سے افریقہ سے غیر قانونی طور پر آنے والے 39 تارکین وطن ہلاک اور 100 لاپتہ ہوگئے۔

یمنی حکام کا کہنا ہے کہ تارکین وطن کی کشتی عدن کے مشرق میں شبوا گورنری کے ساحل پر پہنچنے سے پہلے ہی ضلع روڈم میں ڈوب گئی ۔

رپورٹ کے مطابق ماہی گیر اور مقامی رہائشی افراد 78 تارکین وطن کو بچانے میں کامیاب رہے تاہم تقریباً 100 افراد تاحال لاپتہ ہیں جن کی تلاش کیلئے ریسکیو آپریشن جاری ہے۔

کشتی میں موجود زندہ بچ جانے والوں نے امدادی کارکنوں کو بتایا کہ کشتی میں 250 کے قریب افراد سوار تھے، تیز ہواؤں کے باعث کشتی ڈوب گئی۔

عدن کے مشرقی ضلع روڈم کے مقامی حکام نے بتایا کہ جہاز میں سوار افراد تارکین وطن تھے، جن میں زیادہ تر کا تعلق ایتھوپیا سے ہیں جو خلیجی ریاستوں تک پہنچنے کے لیے یمن کو بطور ٹرانزٹ پوائنٹ استعمال کرتے ہیں۔