یورو کپ 2024 میں فرانسیسی ٹیم کے کپتان اور فارورڈ کائلیان ایمباپے اپنی ناک تڑوا بیٹھے۔
جرمنی کے شہر ڈسلڈورف میں آسٹریا کے خلاف ہونے والے میچ میں 25 سالہ کائلیان ایمباپے کا چہرہ ہیڈ شاٹ لگانے کی کوشش میں حریف کھلاڑی کے کندھے سے ٹکرا گیا۔
ٹکرانے کے باعث ایمباپے کی ناک کی ہڈی ٹوٹ گئی اور ناک سے خون بہنا شروع ہو گیا جس کے بعد فارورڈ کو طبی امداد کے لیے فوری طور پر قریبی اسپتال لے جایا گیا۔
اس حوالے سے فرانسیسی فٹ بال فیڈریشن کا کہنا ہے کہ ایمباپے اب ٹھیک ہیں اور وہ ٹیم کے بیس کیمپ میں واپس آ گئے ہیں۔
فیڈریشن کے ترجمان کا کہنا تھا کہ فی الحال سرجری کی ضرورت نہیں ہے، لیکن آنے والے دنوں میں ان کا علاج کیا جائے گا۔
ایف ایف ایف ایمباپے کی ناک کی حفاظت کیلئے خصوصی ماسک بنوانے کا سوچ رہی ہے تاہم ایمباپے جمعہ کو نیدرلینڈز کے خلاف میچ میں حصہ لیں گے یا نہیں،اس بارے میں کوئی اطلاعات سامنے نہیں آئیں ۔
میچ کے بعد پریس کانفرنس کرتے ہوئے فرانسیسی فٹ بال ٹیم کے کوچ ڈیڈیئر ڈیشومپس نے کہا کہ آج کا دن کپتان کے لیے اچھا نہیں تھا اور ان کی ناک بری طرح متاثر ہوئی ہے۔
یورو کپ 2024 میں فرانس کی ساری امیدیں کائلیان ایمباپے سے ہیں، ٹیم کے اس اہم کھلاڑی نے فرانس کے لیے 80 میچوں میں 47 گولز سکور کیے ہیں۔
