یورپی ممالک میں برفباری اور سیلاب، ریسکیو کیلئے کشتیاں چل گئیں

بحر اوقیانوس کے طوفان کے بعد شمال مغربی یورپ میں سیلاب اور برفباری کے بعد نظام زندگی شدید متاثر ہوگیا۔

فرانس اور سیلاب سے متاثرہ دیگر ممالک میں لوگوں کو کشتیوں کے ذریعے محفوظ مقامات پر منتقل کیا گیا۔

شمالی فرانس میں امدادی عملے نے پاس ڈی کیلیس ڈپارٹمنٹ کے آرکس قصبے میں زیر آب گھروں سے رہائشیوں کو نکالنے میں مدد کی، یہ علاقہ شدید بارشوں کے بعد دو ماہ میں دوسری بار سیلاب کی زد میں آیا تھا۔

برطانیہ، آئرلینڈ اور نیدرلینڈز کی سرکاری موسمیاتی سروسز کی جانب سے طوفان کو ”ہینک“ کا نام دیا گیا ہے جس کی وجہ سے برطانیہ کے مختلف علاقوں میں بجلی کی بندش، نقل و حمل کے مسائل، املاک کو نقصان اور خلل پڑا ہے۔

برطانیہ میں سب سے زیادہ تیز ہوائیں جنوبی انگلینڈ کے ساحل کے قریب آئیل آف وائٹ پر ریکارڈ کی گئیں، جہاں ہوا کی رفتار میں اضافہ ہوا۔

انگلینڈ اور ویلز میں 10 ہزار گھر بجلی سے محروم ہوگئے، مختلف حادثات میں 2 افراد کی ہلاکت ہوئی ہے۔