یورپی یونین کی جانب سے یوکرین کو یورپی یونین کا ممبر بنانے کے حوالے سے مذاکرات شروع کرنے کی منظوری دے دی گئی۔
برسلز میں ہونے والی یورپی یونین سمٹ کے دوران یوکرین کی رکنیت سے متعلق اہم فیصلے کی منظوری دی گئی، عملی طور پر یوکرین کو یونین کا رکن بننے کیلئے کافی وقت درکار ہو گا تاہم یہ فیصلہ مغرب میں یوکرین کے مفادات کے تحفظ اور اسے روسی اثرات سے محفوظ رکھنے کیلئے کیا گیا ہے۔
یورپی یونین کی جانب سے ہنگری کے تحفظات کے باوجود یوکرین کو ممبر شپ دینے کا فیصلہ انتہائی غیر روایتی انداز سے کیا گیا جس پر روس سے قریبی تعلقات رکھنے والے ہنگری کے وزیر اعظم نے اجلاس چھوڑ کر جانے کا اعلان کیا جس پر اتحاد کے 26 ارکان بھی رضا مند دکھائی دیئے۔
یوکرینی صدر ولادیمیر زیلنسکی نے یورپی یونین کے فیصلے کو یوکرینی فتح قرار دیکر یوکرینی عوام کو مبارک باد دیتے ہوئے کہا ہے کہ یہ کامیابی ہمارے لیے مزید حوصلہ افزا، متاثر کن اور مضبوطی ثابت ہو گی، تاریخ ہمیشہ انہوں نے لکھی جو کبھی آزادی کی جنگ سے نہیں گھبرائے۔۔
