یوکرین کے لئے امدادکا بل منظور نہ کیا گیا، تو یہ “پوٹن کے ہاتھوں میں کھیلنے” کے مترادف ہوگا: بائیڈن

امریکہ کے صدر جو بائیڈن نے ایوان نمائندگان کے اراکین پر زور دیا ہے کہ وہ فوری طور پر یوکرین، اسرائیل اور تائیوان کے لئے 95.3 ارب ڈالر کا امدادی پیکیج منظور کریں۔

جو بائیڈن نے خبردار کرتے ہوئے کہا کہ ایسا نہ کیا گیا تو یہ روس کے صدر “پوٹن کے ہاتھوں میں کھیلنے” کے مترادف ہوگا۔

بائیڈن نے کہا کہ اس بل کی حمایت کرنا پوٹن کے سامنے کھڑے ہونے کے مترادف ہے۔ انہوں نے کہا کہ “ہم اس وقت منہ نہیں موڑ سکتے، کیونکہ پوٹن کو اسی کی توقع ہے”۔

امریکی سینٹ نے منگل کی صبح یوکرین، اسرائیل اور تائیوان کے لیے پچانوے ارب ڈالر کے امدادی پیکیج پر ووٹ دیا تھا، لیکن اس پیکج کو ریپبلیکن کنٹرول والے ایوان نمائیندگان میں مخالفت کا سامنا ہے۔

سینٹ میں یہ بل 29 کے مقابلے میں 70 ووٹوں کی اکثریت سے منظور کیا گیا۔ اور ایک درجن سے زیادہ ریپبلیکن سینٹروں نے اکثریتی ڈیمو کریٹک پارٹی کے ساتھ بل کی حمایت میں ووٹ دیا۔

ایوان نمائندگان کے اسپیکر مائیک جانسن نے کہا کہ ترجیح یہ ہے کہ دنیا میں کہیں بھی اضافی امداد بھیجنے سے پہلے امریکہ خود اپنی سرحد کو محفوظ بنائے۔