یو اے ای کی فیکٹری میں آگ لگنے سے نو پاکستانی زخمی

متحدہ عرب امارات میں پاکستان کے سفیر نے بتایا کہ عجمان میں ایک کیمیل فیکٹری میں لگنے والی آگ میں نو پاکستانی شہری زخمی ہو گئے۔

یو اے ای میں پاکستانی سفارت خانے کے مطابق جس فیکٹری میں آگ لگی اس میں سینیٹائزرز اور پرفیوم بنائے جاتے ہیں۔

حادثے میں زخمی ہونے والے پاکستانی شہریوں کا تعلق سندھ کے علاقے شہید بینظیر آباد اور پنجاب کے شہر ڈیرہ غازی خان سے ہے۔

متحدہ عرب امارات کے لیے پاکستانی سفیر فیصل نیاز ترمذی نے عرب نیوز کو بتایا کہ ’آگ لگنے کا یہ افسوس ناک حادثہ عجمان میں سینیٹائزرز اور پرفیوم سے جڑے کیمیکل کی فیکٹری میں پیش آیا۔‘

فیصل نیاز ترمذی نے مزید بتایا کہ زخمی پاکستانیوں کو عجمان، ابوظبی اور شارجہ کے ہسپتالوں میں لے جایا گیا۔

ان کا کہنا ہے کہ ’میں یقین دلاتا ہوں کہ حادثے کا شکار پاکستانیوں کو تمام ممکنہ سہولیات فراہم کی جائیں گی۔‘