کوئی ڈیل نہیں کی، راستے سے نہیں ہٹوں گا، بات چیت کے لئے تیار ہوں،عمران خان کا جیل سے پیغام

پاکستان تحریک انصاف کی قانونی ٹیم میں شامل وکلا انتظار پنجوتھا، شعیب شاہین، نعیم پنجوتھا اور گوہرعلی اور عمران خان کے ذاتی معالج ڈاکٹرفیصل سلطان نے اٹک جیل میں قید سابق وزیراعظم سے ملاقات کی

ملاقات کے بعد میڈیا سے گفتگو میں بیرسٹر گوہر علی کا کہنا تھاکہ چیئرمین پی ٹی آئی نےکہا انہیں جیل میں ناجائز ڈالاگیا لیکن اس سب کے باوجود وہ اداروں اور سیاسی جماعتوں سے گفتگو کو تیار ہیں۔

انہوں نے کہا کہ چیئرمین پی ٹی آئی سے بات چیت کا محور ہوگا کہ 90 دن میں الیکشن کیسے ہوں؟

پی ٹی آئی کے وکیل شعیب شاہین کا کہنا تھا کہ عمران خان تندرست اور مکمل فٹ ہیں، ان کا پیغام ہے سیاسی استحکام آنے تک ملک ترقی نہیں کرسکتا۔

ان کا کہنا تھا کہ چیئرمین پی ٹی آئی نے کہا ملک میں عدالتوں کا احترام نہیں، میں نے کوئی ڈیل نہیں کی۔

شعیب شاہین نے بتایا کہ چیئرمین پی ٹی آئی روزانہ ایک گھنٹہ ورزش کرتے ہیں، انہوں نے کہا اپنے راستے سے نہیں ہٹوں گا جن کے اثاثے باہر ہیں ڈالر بڑھنے کا انہیں فائدہ ہوا، میری سیاسی جہدوجہد اور قربانی قوم کے لیے ہے۔

خیال رہے کہ سابق وزیراعظم عمران خان 13 ستمبر تک سائفر کیس میں جوڈیشل ریمانڈ پر اٹک جیل میں قید ہیں۔