لاہور کے قذافی اسٹیڈیم میں سری لنکا نے افغانستان کو شکست دے کر ایشیا کپ سے باہر کردیا۔۔
سری لنکا کی جانب سے دیے گئے 292 رنز کا ہدف کے تعاقب میں افغانستان کی پوری ٹیم 38 ویں اوور میں 289 بنا کر آؤٹ ہوگئی، شاندار جیت کے ساتھ ہی سری لنکا نے سپر فور مرحلے کیلئے کوالیفائی کرلیا۔
افغان ٹیم شاندار بیٹنگ کے باوجود صرف 3 رنز کے فرق سے سپر فور مرحلے کیلئے کوالیفائی نہ کرسکی، محمد نبی نے 65 اور کپتان حشمت اللہ شاہدی نے 59 رنز کی شاندار اننگز کھیلی۔
راشد خان نے 27 رنز کی ناٹ آؤٹ اننگز کھیلی۔
سری لنکا کی جانب سے کاسن راجیتھا نے چار کھلاڑیوں کو پویلین کی راہ دکھائی، ڈی سلوا اور ولالیگا نے دو، دو وکٹیں حاصل کیں۔
سری لنکا نے افغانستان کے خلاف پہلے بیٹنگ کرتے ہوئے مقررہ اوورز میں 8 وکٹوں کے نقصان پر 291 رنز بنائے اور افغانستان کو جیت کے لیے 292 رنز کا ہدف دیاتھا۔
وکٹ کیپر بلے باز کوشل مینڈس 92 رنز بنا کر نمایاں رہے ، افغانستان کی جانب سے گلبدین نائب نے 4، راشد خان نے 2 اور مجیب الرحمان نے ایک وکٹ حاصل کی۔
