چین: ملکی جذبات مجروح کرنے والے لباس پہننے پر سزا کا مسودۂ قانون تیار

چین ایک ایسے قانون کا مسودہ تیار کر رہا ہے جس کے تحت ایسا لباس پہننے پر لوگوں کو سزا دی جائے گی جو ‘چین کی روح یا جذبات’ کو مجروح کرتا ہو۔

مجوزہ مسودہ قانون کے آرٹیکل 34-2 کے مطابق یہ قانون ان لوگوں کو نشانہ بنائے گا جو خود ایسے کپڑے، لوازمات یا علامتیں پہنتے ہیں یا دوسروں کو پہننے پر مجبور کرتے ہیں جو چین کی ثقافت کو ٹھیس پہنچاتے ہوں۔

مسودے کے مطابق قانون کی خلاف ورزی کرنے والوں کو پانچ سے 10 دن تک حراست میں رکھا جا سکے گا اور زیادہ سے زیادہ پانچ ہزار یوآن، یعنی 687 ڈالر تک جرمانہ کیا جا سکے گا ۔

مجوزہ قانون کے خلاف آن لائن عوامی ردِعمل نے اسے بہت ‘زیادہ مداخلت’ اور مضحکہ خیز قرار دیا ہے۔انسانی حقوق کے علمبردار اس مجوزہ قانون کو آزادیٔ اظہار کے خلاف بیجنگ کی طرف سے تازہ ترین پابندی قرار دے رہے ہیں۔

چین کی نیشنل پیپلز کانگریس کی قائمہ کمیٹی نے حال ہی میں پبلک سیکیورٹی ایڈمنسٹریشن سزا کے اس قانون کا جائزہ لیا تھا اور پھر اسے جاری کیا تھا۔