آذربائیجان کےعلاقے ناگورنو کاراباخ میں لڑائی کے دوران ایک فیول ڈپو پر دھماکے سے 20 افراد ہلاک ہوگئے ہیں جب کہ جنگ کے دوران علاقے سے آرمینیائی باشندوں کی نقل مکانی جاری ہے۔
دھماکہ کاراباخ کے علاقے خان کندی میں ہوا جہاں 13 لاشیں ملیں جب کہ 7 افراد زخموں کی تاب نہ لاتے ہوئے دم توڑ گئے ہیں۔
حکام نے کہا کہ 290 افراد کو اسپتال میں داخل کرایا گیا ہے اور درجنوں مریضوں کی حالت تشویشناک ہے، دھماکے کے وقت وہاں سیکڑوں افراد جمع تھے۔
Explosion in Stepanakert, Nagorno-Karabakh 🔥
At least 20 killed and hundreds injured after fuel depot blast.#Armenia #war #Azerbaijan pic.twitter.com/pRAcHHxdgc— EdMar ☀️ (@d00m777) September 26, 2023
اس فیول ڈپو سے ان لوگوں کو ایندھن فراہم کیا جا رہا تھا جو قرہ باغ چھوڑ کر آرمینیا جا رہے ہیں۔
آذربائیجان کی جانب سے خطے کی کئی ماہ سے ناکہ بندی جاری ہے جس کی وجہ سے اشیائے ضروریہ کی قلت پیدا ہو گئی تھی۔
آرمینیا کا کہنا ہے کہ 13 ہزار سے زائد بے گھر افراد ملک میں داخل ہوئے ہیں۔ ایک بیان میں حکومت نے یہ بھی کہا کہ وہ تمام ضرورت مندوں کو رہائش فراہم کرے گی۔
واضح رہے کہ آذربائیجان کی فوج نے 19 ستمبر کو ناگورنو کاراباخ پر حملہ کیا اور 24 گھنٹے بعد علاقے کا کنٹرول حاصل کرنے کا اعلان کیا تھا۔
