پاکستان مسلم لیگ (ن) کے قائد اور سابق وزیراعظم نواز شریف آج وطن واپس آئیں گے اور لاہور میں جلسہ عام سے خطاب بھی کریں گے۔
لاہور میں نواز شریف کے استقبال کے لیے کراچی، کوئٹہ، گلگت، مظفرآباد سمیت مختلف شہروں سے ٹرینوں اور بسوں میں قافلے پہنچنا شروع ہوگئے ہیں۔
مینار پاکستان گراؤنڈ میں مسلم لیگ ن کے جلسے کی تیاریاں حتمی مراحل میں داخل ہو چکی ہیں۔ نواز شریف کے خطاب کیلئے مرکزی اسٹیج تیار کر لیا گیا ہے جبکہ پنڈال میں 40 ہزار کرسیاں لگانے کا دعویٰ کیا جارہا ہے۔
سابق وزیراعظم نواز شریف کے خطاب کیلئے 40 فٹ اونچا اسٹیج بنایا گیا ہے، اسٹیج کے پیچھے سیکیورٹی کیلئے 3 کنٹینرز لگائے گئے ہیں۔جلسہ گاہ میں بڑی بڑی لائٹس اور مسلم لیگ ن کے جھنڈے بھی لگا دیے گئے ہیں۔
سول ایوی ایشن اتھارٹی کا کہنا ہے کہ نواز شریف کے خصوصی چارٹرڈ طیارے کی دبئی سے پاکستان روانگی کیلئے پرواز FZ4525 دبئی سے صبح 9:25 پر اڑان بھرے گی، طیارہ پاکستانی وقت کے مطابق دوپہر 12:30 پر اسلام آباد انٹرنیشنل ایئرپورٹ پر لینڈ کرے گا
سی اے اے کا کہنا ہے کہ طیارہ واپس اسلام آباد سے لاہور کے لیے 2:30 پر روانہ ہو گا جو 3:20 پر علامہ اقبال ایئرپورٹ لاہور پر لینڈ کرے گا۔سول ایوی ایشن اتھارٹی نے پرواز کو اسلام آباد اور لاہور ایئرپورٹس پر لینڈنگ کی اجازت دے رکھی ہے۔
