مصر کی رفح راہداری سے غزہ میں امدادی سامان کے ٹرک داخل ہونا شروع ہو گئے۔
اس امدادی قافلے میں 20 ٹرک ہیں جو ادویہ، طبی سامان اور خوراک کی محدود مقدار لے جا رہے ہیں۔
7 اکتوبر کو تنازعے کے آغاز سے رفح راہداری بند تھی اور امدادی سامان سے لدے ٹرک منتظر تھے کہ کب وہ غزہ میں داخل ہوسکیں، حماس کے حملے کے بعد اسرائیل نے غزہ کی پٹی پر بمباری کی اور خوراک، پانی، ایندھن اور بجلی کی مکمل بندش کر دی تھی ۔
محکمہ صحت کے حکام کے مطابق اسرائیلی بمباری کے نتیجے میں اب تک چار ہزار سے زائد شہادتیں ہو چکی ہیں جبکہ 13ہزار سے زائد زخمی ہوئے ہیں۔
دوسری جانب فلسطین کے لیے اقوامِ متحدہ کی ریلیف اینڈ ورکس ایجنسی نے اپنے بیان میں کہا ہے کہ غزہ میں 7 اکتوبر سے اب تک عملے کے 17 افراد جاں بحق ہو چکے ہیں۔
علاوہ ازیں عالمی ادارۂ صحت کے سربراہ ڈروس نے اسرائیلی دھمکی پر تشویش کا اظہار کرتے ہوئے کہا ہے کہ القدس ہسپتال خالی کرنے کے مبینہ احکامات پریشان کن ہیں ، مریضوں سے بھرے ہسپتال کو محفوظ طریقے سے خالی کرنا ممکن نہیں۔
