آئی سی سی کرکٹ ورلڈکپ 2023 کے 24 ویں میچ میں آسٹریلیا نے نیدرلینڈز کو 309 رنز سے بآسانی شکست دیدی۔
بھارت کے شہر دہلی کے ارون جیٹلی کرکٹ سٹیڈیم میں ہونیوالے میچ میں آسٹریلوی ٹیم نے پہلے بیٹنگ کرتے ہوئے مقررہ 50 اوورز میں 8 وکٹوں کے نقصان پر 399 رنز بنائے۔
گلین میکسول نے جارحانہ بلے بازی کا مظاہرہ کرتے ہوئے 40 گیندوں پر سنچری بنا ڈالی ، انہوں نے 8 چھکوں اور 9 چوکوں کی مدد سے 106 رنز جبکہ اوپنر بلے باز ڈیوڈ وارنر نے بھی 104 رنز کی شاندار اننگز کھیلی۔
آسٹریلیا کی کی جانب سے مارنس لبوشین 62، جوش انگلس 14، ڈیوڈ وارنر 104 ، کیمرون گرین 8 ، گلین میکسول 106 اور مچل سٹارک بغیر کوئی رن بنائے آؤٹ ہوئے۔
نیدرلینڈز کی جانب سے لوگن وین بیک نے 4، باس ڈی لیڈے نے 2 جبکہ آرین دت نے ایک وکٹ حاصل کی۔
400 رنز کے ہدف کے تعاقب میں نیدر لینڈز کی پوری ٹیم 21 اوورز میں 90 رنز بنا کر پویلین لوٹ گئی، آسٹریلیا کی جانب سے ایڈم زمپا نے 4 ، مچل مارش نے 2 جبکہ پیٹ کمنز ، جوش ہیزل ووڈ اور مچل سٹارک نے ایک ایک وکٹ حاصل کی۔
