بھارتی حکومت اپنے ہی شہریوں کی جاسوسی کرنے لگی ۔۔ صحافی اور سیاستدانوں کے فونز ہیک کرنے کی کوشش پر موبائل فون کمپنی ایپل نے ہیکنگ الرٹ بھیج دیئے
ایپل کی جانب سے یہ الرٹ کرپشن سے جڑے معاملات کی رپورٹنگ کرنے والے صحافی آنند مانگنالے سمیت بھارت میں 20 سے زائد افراد کو بھیجے گئے جن میں زیادہ تر حزب اختلاف سے تعلق رکھنے والے سیاستدان ہیں۔
تحقیقاتی صحافیوں کے عالمی نیٹ ورک آرگنائزڈ کرائم اینڈ کرپشن رپورٹنگ پروجیکٹ کے شریک بانی ڈریو سلیوان کا کہنا ہے کہ بھارت کے حمایت یافتہ ہیکرز نے اگست 2023 میں ایک بھارتی صحافی کے آئی فون پر این ایس او گروپ کے سافٹ ویئر ’پیگاسس‘ سے جاسوسی کی کوشش کی۔
ایپل کی جانب سے بھیجے گئے الرٹس میں ہیکس کے پیچھے بھارتی حکومت یا استعمال شدہ سپائی ویئرکی نشاندہی نہیں کی گئی، تاہم صحافی کے فون کا فرانزک کرنے والی کمپنی نے جاسوسی کیلئے استعمال کیے جانے والے سافٹ ویئر پیگاسس کی نشاندہی کی ہے۔
او سی سی آر پی کے شریک بانی کا کہنا ہے کہ فرانزک تحقیق نے بھارتی صحافی کے فون کی ہیکنگ کی کوشش اسرائیلی فرم این ایس او کے ہیکنگ ٹول پیگاسس سے جوڑی ہے۔
یہ جاسوس ویئر ہیکرز کو اہداف کے سمارٹ فونز تک رسائی کی اجازت دیتے ہوئے انہیں کالزریکارڈ کرنے، پیغامات روکنے اورفون سننے کے قابل آلات میں تبدیل کرنے کی اجازت دیتا ہے۔
ڈریو سلیوان کے مطابق بھارتی صحافی کے فون پر ٹول کا استعمال ناقابل قبول اوراشتعال انگیز تھا۔جو حکومت بھی صحافیوں کی جاسوسی کررہی ہے، اس اقدام کی سیاسی مفاد کے علاوہ کوئی معقول وضاحت نہیں ہے۔
