پاکستان پیپلز پارٹی کے چیئرمین بلاول بھٹو زرداری نے 10 نکاتی انتخابی منشور دے دیا اور انہوں نے اقتدار میں آکر 300 یونٹس تک بجلی مفت، 30 لاکھ گھر دینے اور 5 سال میں تنخواہیں ڈبل کرنے کا اعلان کردیا۔
بلاول بھٹو زرداری نے یہ اعلان گڑھی خدابخش میں سابق وزیراعظم بینظیر بھٹو شہید کی 16ویں برسی پر پیپلزپارٹی کے جلسہ عام سے خطاب کے دوران کیا ہے۔
بلاول بھٹو زرداری نے کہا کہ 10 نکات پر عملدرآمد کرلیں تو تمام مسائل کا حل نکال سکتے ہیں، پیپلزپارٹی حکومت کی پہلی ترجیح تنخواہوں کو 5 سال میں دگنا کرنا ہوگا۔
چیئرمین پیپلز پارٹی نے مزید کہا کہ ہم غریب ترین طبقے کے لیے 300 یونٹ تک سولر سسٹم فراہم کریں گے، ہر ضلع میں گرین انرجی پارکس کھولیں گے، پبلک پرائیویٹ پاٹنرشپ کے تحت صحت کا نظام بہتر بنائیں گے۔
“پاکستان پیپلز پارٹی کے جیالے گڑھی خدا بخش میں جمع ہوکر پوری دنیا کو ایک ہی پیغام بھیجتے ہیں کہ زندہ ہے بی بی زندہ ہے۔
16 سال قبل کچھ قوتوں نے سوچا کہ محترمہ بینظیر بھٹو کو شہید کرکے وہ پاکستان پیپلز پارٹی کو ختم کردیں گے، وہ غریب، مزدور، کسان، طلب علم اور نوجوانوں کی آواز کو… pic.twitter.com/DZpQq16gFF— PPP (@MediaCellPPP) December 27, 2023
ان کا کہنا تھا کہ سیلاب متاثرین کو 20 لاکھ گھر بناکر دیں گے، غریب ترین خواتین کو گھروں کے مالکانہ حقوق دیں گے، اپنی زمین، اپنا مکان کے نعرے کو حقیقت میں تبدیل کریں گے۔
بلاول بھٹو زرداری نے کہا کہ پیپلزپارٹی ہاری کارڈ اور کسان کارڈ لے کر آئے گی، چھوٹے کسانوں کو براہ راست سبسڈی دیں گے، مزدوروں کو ان کا جائز حق دلائیں گے، مزدوروں کے لیے سوشل سیکیورٹی پروگرام لائیں گے، بینظیر مزدور کارڈ کے ذریعے ان کی مدد کریں گے۔
بلاول بھٹو نے مزید کہا کہ نوجوانوں کو روزگار کے لیے قرض فراہم کریں گے، ہر ضلع میں نوجوانوں کے لیے یوتھ سینٹر بنائیں گے، یوتھ سینٹر میں لائبریری، ڈیجیٹل لائبریری اور اسپورٹس سینٹر ہوگا۔
سابق وزیر خارجہ نے یہ بھی کہا کہ غریبوں کے لیے بھوک مٹاؤ پروگرام لے کر آئیں گے۔
انتخابات کے حوالے سے بلاول بھٹو نے کہا کہ الیکشن کا دن اب نظر آرہا ہے، 8 فروری کو الیکشن ہوگا، امیدواروں سے کہتا ہوں تیاری پکڑو، دما دم مست قلندر ہوگا، تمام جیالے اپنے آپس کے اختلافات بھول کر ایک ہوجائیں۔
