پاکستان میں 8 فروری کو ہونے والے عام انتخابات کے باعث پاکستانیوں کی بڑی تعداد سیاسی جماعتوں، نامزد امیدواروں اور دیگر موضوعات کے بارے میں آن لائن سرچز کرتی دکھائی دیتی ہے۔
عوام کی الیکشن سے متعلق ڈیٹا تک رسائی کو آسان بنانے کے لیے سرچ انجن کمپنی گوگل نے ’گوگل ٹرینڈز پاکستان جنرل الیکشن‘ کے نام سے ایک ویب پیج متعارف کروا دیا ہے۔
اس پیج پر انتخابات میں حصہ لینے والی جماعتوں کے بارے میں ٹاپ سرچ میں رہنے والے سوالات، موضوعات اور عوامی دلچسپیوں کے حوالے سے معلومات کو پیش کیا گیا ہے۔
یہ پیج مقامی سطح پر مخصوص موضوعات کے بارے میں لوگوں کی دلچسپی اور زیادہ سرچ کیے جانے والے موضوعات کو ظاہر کرتا ہے۔ کسی خاص سرچ میں اضافہ اس بات کی عکاسی نہیں کرتا کہ کوئی سیاسی جماعت کسی بھی معنوں میں ’زیادہ مقبول‘ ہے یا ’جیت‘ رہی ہے۔
گوگل ٹرینڈز پیج کے مطابق پچھلے 14 دنوں میں سب سے زیادہ 77 فیصد لوگوں نے پاکستان تحریک انصاف کے حوالے سے معلومات سرچ کیں۔
دوسرے نمبر پر مسلم لیگ(ن) کے حوالے سے معلومات ڈھونڈے والوں کا تناسب 14 فیصد رہا۔
پیپلز پارٹی کے حوالے سے 3 فیصد لوگوں نے معلومات تلاش کیں جب کہ تحریک لبیک پاکستان کے حوالے سے 2 فیصد لوگوں نے معلومات سرچ کیں۔
متحدہ قومی موومنٹ، جمعیت علمائے اسلام ف، جماعت اسلامی اور اے این پی سے متعلق ایک ایک فیصد لوگوں نے معلومات ڈھونڈیں۔
ذیل میں دیا گیا ڈیٹا براہ راست گوگل سے اپ ڈیٹ ہو رہا ہے جس میں وقت کے ساتھ تبدیلی آسکتی ہے۔
https://trends.google.com/trends/explore?date=2023-12-27%202024-01-10&geo=PK&q=%2Fm%2F024tv_&hl=en