امریکا میں خون جما دینے والی سردی، مختلف حادثات میں اموات کی تعداد 59 ہو گئی

امریکا کے بیشتر شہروں میں خون جما دینے والی سردی کی لہر جاری ہے۔

 برفانی طوفان سے مختلف حادثات کے دوران اموات کی تعداد 59 ہو گئی ہے۔

امریکی شہر شکاگو میں پارا منفی 30 ڈگری تک گر گیا ہے، طوفان کی شدت سے درخت اور بجلی کی تاریں گرگئیں جس سے ہزاروں مکانات اور کاروباری مراکز کو بجلی کی فراہمی معطل ہوگئی۔

برف جمنے سے پھسلن اور برف سے ڈھکی ہوئی سڑکوں پر ٹریفک حادثات بھی پیش آئے ہیں۔

کئی اسکولوں میں تعلیمی سرگرمیاں معطل ہیں تو فضائی آمدورفت میں بھی خلل آیا ہے۔

سب سے زیادہ اموات ٹینیسی میں ریکارڈ کی گئیں جہاں 19 افراد سردی سے لقمہ اجل بن گئے۔

اوریگون میں 9، الینوائے اور مسیسیپی میں 6، ریاست واشنگٹن اور کینٹکی میں 5، ریاست نیویارک میں 3، لوزیانا میں 2 اور آرکنساس، وسکونسن، وومنگ اور نیو ہیمپشائر میں ایک ایک اموات ریکارڈ کی گئیں۔