پاکستان تحریک انصاف کے بانی اور سابق وزیراعظم پاکستان عمران خان اور ان کی اہلیہ بشریٰ بی بی کو دوران عدت نکاح کے کیس میں پاکستان پینل کوڈ کی دفعہ 496 کے تحت سات، سات سال قید اور پانچ، پانچ لاکھ جرمانے کی سزا سنا دی گئی ہے
اسلام آباد کی ڈسٹرکٹ اینڈ سیشن عدالت کے فیصلے کے مطابق 39 روز میں عدت پوری ہونے کے حوالے سے سپریم کورٹ کی ججمنٹ عدالت میں پیش کی گئی۔ سپریم کورٹ فیصلے کا اطلاق اس کیس میں نہیں ہوتا۔‘
عدت میں نکاح کیس میں ایک شکایت کنندہ اور تین گواہان کے بیانات ریکارڈ کیے گئے اور ان پر جرح کی گئی۔ فرد جرم عائد ہونے کے بعد دو روز میں طویل سماعتوں میں بیانات اور جرح کا عمل مکمل کیا گیا۔
اس حوالے سے بیرسٹر گوہر نے فیصلے کے بعد میڈیا سے گفتگو میں کہا کہ ’جج نے زبانی فیصلہ سنایا ہے ابھی تحریری فیصلہ موجود نہیں ہے۔‘
انہوں نے کہا کہ وہ اس فیصلے کو ہائی کورٹ میں چیلنج کریں گے۔
اس سے قبل جمعے کی شب اڈیالہ جیل میں 13 گھنٹے سے زائد تک جاری رہنے والی سماعت کے اختتام کے بعد سول جج قدرت اللہ نے کیس کا فیصلہ محفوظ کیا تھا۔