سابق صدر ڈونلڈ ٹرمپ نے کہا ہے کہ جو نیٹو ممالک دفاعی اخراجات میں برابر کا حصہ نہیں ڈالتے، تو ان کے اجتماعی دفاع کی شق کی پابندی نہیں کریں گے۔
امریکا کے سابق صدر نے کہا ہے کہ نیٹو کا جو رکن ملک دفاعی اخراجات کے حوالے سے طے شدہ اصولوں پر عمل نہ کرے تو ہم روس کی حوصلہ افزائی کریں گے کہ اس ملک کیساتھ وہ جو چاہے کر لے۔
جنوبی کیرولینا کے شہر کونوے میں ریلی سے خطاب کرتے ہوئے انہوں نے کہا کہ ہم نے نیٹو والوں کی چوری پکڑی، یہ لوگ پوچھتے تھے کہ حصہ نہ دینے پر بھی کیا ہمارا دفاع کیا جائے گا؟ میں نے ان ملکوں سے کہا ’’ایبسولیوٹلی ناٹ‘‘ اور پھر ان ملکوں کو ہمارے جواب پر یقین نہ آیا۔
ٹرمپ نے کہا کہ نیٹو میں شامل ایک بڑے ملک کے صدر نے مجھ سے سوال کیا کہ اگر ہم حصہ نہ دیں اور روس ہم پر حملہ کر دے تو کیا ہمارا دفاع کیا جائے گا تو میں نے اُن سے کہا کہ بالکل نہیں امریکا آپ کا دفاع نہیں کرے گا بلکہ میں تو روس کی حوصلہ افزائی کروں گا کہ وہ جو مرضی چاہے کر لے۔ آپ کو حصہ دینا ہوگا، اپنے بلز کی ادائیگی کرنا ہوگی۔