امریکہ کے صدر جو بائیڈن اور سابق صدر ڈونلڈ ٹرمپ ‘سپر ٹیوزڈے’ پر ڈیموکریٹک اور ری پبلکن پارٹی کے پرائمریز مقابلوں میں کامیابی کی طرف گامزن ہیں۔
نتائج کے مطابق بائیڈن نے ڈیموکریٹک پارٹی کے 15 ریاستوں کے تمام پرائمری مقابلوں اور کاکسز میں کامیابی حاصل کی ہے۔
ٹرمپ نے نتائج کے مطابق 13 ریاستوں میں فتوحات حاصل کی ہیں۔
منگل کو ٹرمپ نے جن ریاستوں میں کامیابی حاصل کی ان میں کیلی فورنیا، کولوراڈو، مین، منی سوٹا، نارتھ کیرولائنا اور ٹیکساس شامل ہیں۔
ری پبلکن پارٹی سے صدارتی نامزدگی کے حصول کی دوڑ میں ٹرمپ کی مدِ مقابل سابق امریکی سفیر نکی ہیلی کے سپر ٹیوزڈے کے مقابلوں کے بعد پرائمری دوڑ میں کامیابی کے امکانات تقریبا ختم ہوگئے ہیں۔
امریکی نظام کے تحت سیاسی جماعتوں کے امیدواروں کو صدارتی الیکشن میں نامزدگی کے لیے پارٹیوں کے پرائمری مقابلوں میں کامیابی حاصل کرنا لازمی ہے ۔
سیاسی جماعتوں کے ان پرائمری مقابلوں میں کامیابی کا تعین ڈیلی گیٹس کی کل تعداد کے 50 فی صد کی حمایت کے حصول سے ہوتا ہے۔
ڈیمو کریٹک پارٹی میں کسی سیاست دان کو صدارتی امیدوار کی نامزدگی حاصل کرنے کے لیے تمام ریاستوں اور امریکی کے دیگر علاقوں کے کل ڈیلی گیٹس میں سے 1968 کی حمایت حاصل کرنی ہوتی ہے۔
ری پبلکن پارٹی کی صدارتی نامزدگی حاصل کرنے کے لیے کسی امیدوار کا 1215 مندوبین کی حمایت کا حصول لازم ہے۔
