پیرو میں پولیس نے ‘رولیکس گیٹ’ اسکینڈل کی تحقیقات کے سلسلے میں صدر دینا بولوارٹے کی رہائش گاہ پر چھاپہ مارا ہے۔
دارالحکومت لیما کی پولیس نے صدر کی رہائشگاہ پر چھاپے کے دوران آس پاس سے گزرنے والی ٹریفک کو روک دیا تھا۔ پولیس کارروائی کو مقامی ٹیلی ویژن چینل پر نشر بھی کیا گیا۔
یہ کارروائی اس وقت سامنے آئی جب استغاثہ نے ان کی گھڑیوں کی خریداری کا ثبوت فراہم کرنے کی درخواست کا جواب دینے کے لیے مزید وقت کی درخواست مسترد کر دی تھی۔
حکام ایک درجن سے زائد رولیکس گھڑیوں کو تلاش کر رہے ہیں جن کو صدر بولوارٹے نے مبینہ طور پر ڈیکلیئر نہیں کیا تھا۔
یہ تحقیقات اس وقت شروع ہوئیں جب ایک خبر سامنے آئی کہ خاتون صدر تقریبات میں لگژری گھڑیاں پہنتی ہیں وہ دسمبر 2022 میں انہوں نے عہدہ سنبھالنے کے وقت لی تھیں۔
بولوارٹے نے کہا کہ رولیکس ان کا پرانا آئٹم ہے اور یہ گھڑیاں انہوں نے 18 سال کی عمر سے کام سے حاصل ہونے والی آمدنی سے خریدی تھیں۔
حکومت نے اس ماہ کے اوائل میں اعلان کیا تھا کہ وہ گزشتہ دو سالوں کے ان کے اعلان کردہ اثاثوں کا جائزہ لے گی۔
گزشتہ ہفتے بات کرتے ہوئے بولوارٹے نے زور دے کر کہا تھا کہ وہ ‘صاف ہاتھوں کے ساتھ’ حکومت میں آئی ہیں اور وہ ‘صاف ہاتھوں کے ساتھ جائیں گی۔’
