اسرائیلی فوج نے غزہ کے سب سے بڑے الشفاء اسپتال میں 2 ہفتے تک جاری رہنے والے آپریشن کے بعد انخلا کرلیا۔
اسرائیلی فوج نے بیان میں کہا کہ ’فوجیوں نے الشفا اسپتال کے علاقے میں آپریشن مکمل کرلیا ہے اور علاقے سے باہر نکل گئے ہیں۔‘
غزہ کے میڈیا آفس کے مطابق الشفا اسپتال میں محاصرہ شروع ہونے کے بعد سے اب تک کے 400 سے زائد افراد مارے گئے ہیں، جن میں مریض، جنگ سے بے گھر فلسطینی اور اسپتال کا عملہ شامل ہے۔
دوسری جانب عالمی ادارہ صحت کا کہنا ہے کہ 18 مارچ کو اسرائیل کی جانب سے اسپتال پر محاصرہ شروع ہونے کے بعد سے اب تک 21 مریض ہلاک ہو چکے ہیں۔
غزہ میں وزارت صحت نے کہا ہے کہ ’ہسپتال سے درجنوں لاشیں ملی ہیں۔‘
یاد رہے کہ اسرائیل نے 18 مارچ کو اسرائیلی فورسز نے رات گئے غزہ کے الشفا اسپتال پر چھاپہ مارا تھا اور شدید فارئرنگ کرکے درجنوں افراد کو ہلاک اور زخمی کردیا تھا۔
اسرائیل فورسز نے دعویٰ کیا تھا کہ اسے اسپتال کے نیچے سرنگوں کا ایک نیٹ ورک ملا ہے جسے حماس نے اسرائیل ڈیفنس فورس کے نومبر 2023 کے چھاپے کے دوران استعمال کیا تھا۔
تاہم حماس نے اسرائیل فورسز کے الزامات اور دعوؤں کی تردید کردی تھی۔
