جیل میں قید پاکستان کے سابق وزیراعظم عمران خان آج جمعرات کو ایک ویڈیو لنک کے ذریعے سپریم کورٹ میں پیش ہوئے۔
سماعت کی عدالت کی ویب سائٹ اور یوٹیوب پر لائیو اسٹریمنگ نہیں کی گئی ۔ عمومی طور پر سپریم کورٹ کی عدالتی کارروائی لائیو دیکھی جا سکتی ہے۔
71 سالہ عمران خان جیل میں بند ہونے کے بعد سے کئی دیگر عدالتوں میں پیش ہو رہے ہیں لیکن کیمروں کو جیل کے احاطے میں ہونے والی کارروائی کو کور کرنے کی اجازت نہیں ہے۔
سپریم کورٹ نے اس ہفتے حکومت کو حکم دیا تھا کہ وہ اس بات کو یقینی بنائے کہ خان کو ویڈیو لنک کے ذریعے عدالت میں پیش کیا جائے۔
عمران خان کو سن 2022 میں تحریک عدم اعتماد کے ذریعے اقتدار سے ہٹا دیا گیا تھا۔ گزشتہ روز یعنی بدھ کو ایک کرپشن کیس میں بھی انہیں ضمانت مل گئی تھی لیکن انہیں پہلے ہی چار مقدمات میں سزا سنائی جا چکی ہے اور وہ اس وجہ سے جیل میں ہی رہیں گے۔ چار مقدمات میں سے دو میں ان کی سزا معطل کی جا چکی ہے۔
