اسپین سے یوراگوئے جانے والے ایک طیارے کا دوران پرواز کا توازن بگڑنے کے باعث 24 سے زائد مسافر زخمی ہو گئے ہیں۔
ایئر یوروپا کے طیارے بوئنگ 787-9 ڈریم لائنر نے اسپین سے یوراگوئے کے لیے اڑان بھری لیکن دوران پرواز طیارے کو ایئر ٹربیولنس کا سامنا کرنا پڑا
۔
پرواز کو اپنی منزل تک پہنچنے سے پہلے ہی برازیل کے ساحلی شہر نٹال میں ہنگامی لینڈنگ کرنا پڑی۔
برازیل کے صحت عامہ کے حکام کے مطابق ایئر ٹربیولنس کے دوران کچھ مسافر طیارے کی چھت سے ٹکرائے جس سے ان کے سر، گردن اور سینے پر چوٹیں آئیں۔
مقامی طبی ٹیم نے برازیلین میڈیا کو بتایا کہ چھت سے ٹکرانے والے مسافروں کو فریکچر اور چہرے پر زخم آئے۔
ایئرپورٹ انتظامیہ کے مطابق 36 مسافروں کو زخمی حالت میں طبی امداد فراہم کی گئی اور 23 مسافروں کو اسپتال لے جایا گیا
ایئرپورٹ حکام نے بتایا کہ جن مسافروں کا علاج کیا گیا ان میں سے کچھ صدمے سے دوچار تھے لیکن انہیں کوئی جسمانی چوٹ نہیں آئی۔ پیر کی شام تک پانچ مسافر اسپتال میں داخل تھے جن میں سے چار انتہائی نگہداشت میں ہیں۔