پیرس اولمپکس میں مینز جیولین تھرو ایونٹ کے فائنل میں ارشد ندیم نے92.97 میٹر کی تھرو کرکے نیا اولمپک ریکارڈ بناتے ہوئے پاکستان کو گولڈ میڈل جتوادیا۔
پیرس اولمپکس کے جویلین تھرو مقابلے میں جمعرات کو بھارت کے نیرج چوپڑا اپنے ٹائٹل کا دفاع کر رہے تھے اور مجموعی طور پر پانچ ایتھلیٹس کے درمیان میڈلز کا مقابلہ تھا۔
مقابلے کا آغاز ہوا تو ارشد ندیم نے اپنی دوسری تھرو 92 اعشاریہ 97 میٹر پھینک کر اولمپکس کی تاریخ کا نیا ریکارڈ قائم کیا۔ اس تھرو کے بعد ارشد نے فضا میں ہاتھ بلند کر کے جشن بھی منایا۔
چوپڑا کو جویلین تھرو مقابلے میں فیورٹ قرار دیا جا رہا تھا لیکن وہ 89 اعشاریہ 45 میٹر کی تھرو کے ساتھ دوسرے نمبر پر رہے اور سلور میڈل حاصل کرنے میں کامیاب رہے۔
ارشد ندیم نے پاکستان کے لیے 40 برس بعد اولمپکس گیمز میں گولڈ میڈل جیتا ہے۔ اس سے قبل 1984 کے لاس اینجلس اولمپکس میں پاکستان ہاکی ٹیم نے گولڈ میڈل جیتا تھا۔
ارشد ندیم پاکستان کو انفرادی مقابلوں میں گولڈ میڈل دلوانے والے پہلے ایتھلیٹ ہیں۔
آج ہونے والے فائنل مقابلے میں ٹرینیڈاڈ اینڈ ٹیباگو کےکیشور ن نے پہلی تھرو 86.16 کی کی جب کہ پاکستان کے ارشد ندیم پہلی تھرو نہ کرسکے۔ جرمنی کے جیولین ویبر بھی پہلی تھرو نہ کرسکے۔
فن لینڈ کے لاسی نے 78.81 کی پہلی تھرو کی، بھارت کے نیرج چوپڑا کی پہلی تھرو ضائع ہوگئی۔فن لینڈ کے اولیور ہیلینڈر نے پہلی تھرو 80.92 کی کی۔
جمہوریہ چیک کے جیکب ویلیج نے دوسری تھرو 84.52 کی کردی۔
جیولین تھرو کے فائنل مقابلے میں بھارت نے چاندی اور گریناڈا نے کانسی کا تمغہ حاصل کیا۔
ان کے بعد پاکستان کے ارشد ندیم نے اپنی دوسری تھرو 92.97 میٹر کی کرکے نیا اولمپک ریکارڈ بنا دیا۔ ارشد ندیم کی یہ اس مقابلے کی اب تک سب سے بہترین تھرو ہے۔
اس سے قبل اولمپک ریکارڈ 90 اعشاریہ 57 میٹر کا تھا جو کہ ناروے کے اینڈریاس تھورکلڈیسن نے 2008 کے بیجنگ اولمپکس میں بنایا تھا
ارشد کے مطابق “جب میں نے تھرو پھینکی تو مجھے ایسا محسوس ہوا کہ میرا ہاتھ میرے ساتھ نہیں ہے اور مجھے لگا کہ یہ ورلڈ ریکارڈ ہو سکتا ہے۔”
ارشد ندیم کے مدِ مقابل بھارتی ایتھلیٹ نیرج چوپڑا جب اپنی آخری تھرو زیادہ دور پھینکنے میں ناکام ہوئے تو ارشد سجدہ ریز ہو گئے۔
ارشد کے مطابق وہ گولڈ میڈل جیتنے کے لیے پرامید تھے اور انہیں لگتا تھا کہ آج ان کا دن ہے۔
چوپڑا نے کہا کہ وہ اپنی آج کی کارکردگی سے خوش نہیں ہیں کیوں کہ مدِ مقابل ارشد کے مقابلے میں ان کی تکنیک اور تھرو پھینکے کی دوڑ درست نہیں تھی۔
