امریکی انتخابات میں رپبلکن صدارتی امیدوار ڈونلڈ ٹرمپ کی انتخابی مہم کے عہدیداروں نے بغیر کوئی ثبوت پیش کئے تہران پر ای میلز ہیک کرنے کا الزام لگایا ہے۔
ٹرمپ کی انتخابی مہم کے ترجمان اسٹیون چیونگ نے ایک بیان میں کہا دستاویزات غیر قانونی طور پر امریکہ کے مخالف غیر ملکی ذرائع سے حاصل کی گئی تھیں، جن کا مقصد 2024 کے انتخابات میں مداخلت کرنا اور ہمارے جمہوری عمل میں افراتفری پھیلانا تھا۔
ٹرمپ کی انتخابی مہم نے مائیکرو سافٹ کے محققین کی جمعے کی رپورٹ کا حوالہ بھی دیا۔
ٹرمپ کی انتخابی مہم کے ترجمان سٹیون چیونگ نے کہا: ’ایرانی جانتے ہیں کہ صدر ٹرمپ ان کی دہشت کو بالکل اسی طرح روکیں گے، جیسے انہوں نے وائٹ ہاؤس میں اپنے پہلے چار سالوں میں کیا تھا۔‘
مائیکرو سافٹ کی رپورٹ میں دعوی کیا گیا ہے کہ ایرانی حکومت سے منسلک ہیکرز نے جون میں امریکی صدارتی مہم کے دوران ایک ’اعلیٰ عہدے دار‘ کے اکاؤنٹ کو ہیک کرنے کی کوشش کی۔
رپورٹ میں مزید کہا گیا کہ ہیکرز نے ایک سابق سیاسی مشیر کے اکاؤنٹ کو ہیک کر لیا اور پھر اسے اس عہدیدار کو نشانہ بنانے کے لیے استعمال کیا۔ اس رپورٹ میں اہداف کی شناخت کے بارے میں مزید تفصیلات فراہم نہیں کی گئیں۔
مائیکرو سافٹ کے ترجمان نے رپورٹ شائع ہونے کے بعد ہدف بنائے گئے عہدیداروں کے نام بتانے یا اضافی تفصیلات فراہم کرنے سے انکار کر دیا۔
مائیکروسافٹ کی رپورٹ کے جواب میں ایران کے اقوام متحدہ کے مشن نے کہا کہ ملک کی سائبر صلاحیتیں ’دفاعی اور ان خطرات کے متناسب ہیں جو اسے درپیش ہیں‘ اور اس کا سائبر حملے شروع کرنے کا کوئی منصوبہ نہیں ہے۔
