غزہ میں سیز فائر کے لیے ثالثوں کی زیر نگرانی جاری مذاکرات کو اگلے ہفتے تک موخر کردیا گیا ہے۔
مذاکرات میں ثالث کا کردار ادا کرنے والے امریکہ، قطر اور مصر نے ایک مشترکہ بیان میں کہا کہ گزشتہ ہفتے ہونے والے معاہدے کے نکات کی روشنی میں واشنگٹن نے نئی تجویز پیش کی تاکہ کسی معاہدے پر تیزی سے عمل درآمد ممکن ہو سکے۔
انہوں نے کہا کہ ثالث آنے والے دنوں میں اس تجویز پر کام جاری رکھیں گے۔
انہوں نے بیان میں کہا کہ جانیں بچانے، غزہ کے لوگوں کو راحت کی فراہمی اور علاقائی کشیدگی میں کمی کے لیے راستے کا تعین کیا جا چکا ہے۔
ایک اسرائیلی عہدیدار نے کہا کہ دوحہ میں ہمارا وفد جمعے کو وطن واپس جا رہا ہے اور توقع ہے کہ اسرائیلی وزیر اعظم بینجمن نیتن یاہو پیر کو امریکی وزیر خارجہ انٹونی بلنکن سے ملاقات کریں گے۔
غزہ میں جنگ کے خاتمے کے لیے کئی ماہ سے جاری مذاکرات کا نیا دور جمعرات کو شروع ہوا تھا جس میں اسرائیل اور ثالث شریک ہوئے تھے جبکہ حماس نے براہ راست مذاکرات میں شرکت نہیں کی البتہ انہیں مذاکرات کی تمام پیش رفت سے آگاہ کیا جاتا رہا۔
