اردو کے چاہنے والوں نے ریاست ٹیکساس کے شہر ڈیلس میں عالمی مشاعرے کا انعقاد کیا۔ اس عالمی مشاعرے کی خاص بات یہ تھی کہ معروف شاعرہ غزالہ حبیب کے شعری مجموعے لامکاں کی تعارفی تقریب اور ایدھی فاؤنڈیشن کا فنڈ ریزر بھی تھا۔ تقریب کے مہمان خصوصی اور ہیوسٹن میں تعینات پاکستان کے قونصل جنرل آفتاب چوہدری کا کہنا تھا معاشرے میں تعمیری سرگرمیوں کے فروغ اور مثبت اقدار کی ترویج کے لیے کتب بینی کا کردار بہت اہم ہے۔ مشاعرے اور ادبی تقاریب ہماری زبان اور ثقافت کے فروغ کا اہم ذریعہ ہیں۔
عالمی مشاعرے میں میزبان غزالہ حبیب، ڈاکٹر آصف قدیر ، عقیل اشرف،فرحان سید، نادر دررانی، فاطمہ زہرا جبین، مہمان اعزازی وصی شاہ اور صدر مشاعرہ منظر بھوپالی نے کلام پیش کیا۔
لامکاں پر تبصرہ کرتے ہوئے منظر بھوپالی، وصی شاہ اور ڈاکٹر عامر قریشی نے غزالہ حبیب کی شخصیت اور شاعری پر بات کی اور کہا غزالہ کی شاعری مضبوط لہجے کی ایک توانا آواز ہے جس میں سماجی شعور کے ساتھ ساتھ کشمیر سے ان کی والہانہ محبت کی جھلک نظر آتی ہے ۔
تقریب سے خطاب میں برکت بسیریا، مولانا اصیل خان، اقبال حسن نے ایدھی فاؤنڈیشن کی خدمات پر روشنی ڈالی۔ اس موقع پر امریکہ کی معروف سماجی شخصیت اور بزنس ٹائیکون جاوید انور نے ایدھی فاؤنڈیشن کے لیے 50 ہزار ڈالر کا عطیہ بھی دیا۔
رات گئے تک جاری رہنے والی تقریب کے اختتام پر شعرائے کرام میں شیلڈز تقسیم کی گئیں۔ شیلڈز حاصل کرنے والوں میں نیلوفر عباسی، اشرف بشیر، کرن حیات، اوشہ پیری، حایقہ خان اور دیگر شامل تھے۔
ڈیلس میں عالمی اردو مشاعرے کا انعقاد
عالمی مشاعرے میں غزالہ حبیب کے مجموعہ کلام کی رونمائی
16
