وائٹ ہاؤس نے جمعہ کے روز ایک بار پھر غزہ میں جنگ بندی کے بارے میں امید کا اظہار کرتے ہوئے کہا ہے کہ قاہرہ میں ہونے والے مذاکرات جنگ بندی کی طرف بڑھ رہے ہیں۔
وائٹ ہاؤس نے اسرائیل اور حماس پر زور دیا ہے کہ وہ بھی آگے بڑھیں۔
غزہ جنگ بندی کے لیے جاری کوششوں کی امریکی وائٹ ہاؤس نے تصدیق کی ہے کہ سی آئی اے چیف ولیم برنز اور سینیئر امریکی ذمہ دار بریٹ مکگرک قا ہرہ میں جمعرات کی شام سے شروع ہونے والے مذاکرات میں شریک ہیں۔
ان مذاکرات کے بارے میں قومی سلامتی کونسل کے لیے امریکی ترجمان جان کربی نے کہا مذاکرات میں جنگ بندی کے لیے پیش رفت ہو رہی ہے۔ اب ہماری ضرورت یہ ہے کہ دونوں طرف سے فریق عملدرآمد کے لیے آگے بڑھیں۔
جان کربی نے کہا ‘ جمعرات کی رات کو ابتدائی طور پر قاہرہ میں جاری مذاکرات تعمیری نوعیت کے تھے۔ اس لیے ہم ان مذاکرات میں ایک طرح سے تحرک دیکھنا چاہتے ہیں۔ ان کے بقول یہ مذاکرات دو دن مزید جاری رہیں گے۔’
انہوں نے کہا ‘ سفارتی کوششوں کے ٹوٹ بکھر جانے کی اطلاعات درست نہیں ، ہمارے وزیر خارجہ نے اسی ہفتے مشرق وسطیٰ کا دورہ کیا ہے۔
ان کا کہنا ہے کہ ‘اسرائیلی وزیر اعظم نیتن یاہو خلا کو پر کرنے والی امریکی تجاویز کے حوالے سے ‘ آن بورڈ ‘ ہیں۔ تاکہ دس ماہ سے زیادہ عرصے پر پھیل چکی جنگ کا خاتمہ ہو سکے ‘
