امریکی صدارتی اُمیدوار کاملاہیرس نے اپنےنائب صدراتی امیدوار ٹِم والز کے ساتھ پہلے مشترکہ انٹرویو میں بات چیت کرتے ہوئے کہا کہ غزہ میں بہت سے بے گناہ فلسطینی مارے جا رہے ہیں لیکن وہ اسرائیل کو ہتھیاروں کی فراہمی نہیں روکیں گی، غزہ میں جنگ بندی کیلئے قیدیوں کے تبادلے کی ضرورت ہے۔
ایک سوال کے جواب میں کاملا ہیرس نے صاف کہا کہ وہ سابق صدر بارک اوباما کی قائم کردہ روایت برقرار رکھتے ہوئے اپنی کابینہ میں ری پبلکن پارٹی کے فرد کو شامل کریں گی کیونکہ وہ ہمیشہ سے مختلف آراء کی حوصلہ افزائی کرتی آئی ہیں۔
سرحدی سکیورٹی کے مسئلے پر کاملا نے ٹرمپ کو بھی برابر کا ذمہ دار قرار دیتے ہوئے کہا کہ جب ڈیموکریٹک اور ری پبلکن پارٹیوں کے ارکانِ کانگریس نے مل کر بارڈر سکیورٹی بل تیار کیا تھا تو ڈونلڈ ٹرمپ نے اپنی سیاست چمکانے کیلئے اُسے مسترد کر دیا تھا۔
انہوں نے کہا کہ وہ اگر صدر منتخب ہوئیں تو اُس قانون کو یقینی بنائیں گی تاکہ امریکہ اور میکسیکو کی سرحد پر 1500 اضافی سکیورٹی ایجنٹس تعینات کیے جا سکیں۔
2019 کے اپنے ایک اور مؤقف سے پیچھے ہٹتے ہوئے کاملا ہیرس نے کہا کہ اب وہ غیر قانونی طور پر سرحد پار کرنے والوں کو سزا دیئے بغیر چھوڑنے کے حق میں نہیں ہیں۔
مریکی صدارتی اُمیدوار کا کہنا ہے کہ پچھلے 5 سال کے دوران فریکنگ اور سرحدی سکیورٹی جیسے کئی اہم معاملات میں اُن کے مؤقف میں ارتقائی تبدیلی آئی ہے لیکن اُن کی اقدار میں کوئی تبدیلی نہیں آئی۔
کاملا نے واضح کیا کہ وہ اب بھی ماحولیاتی تحفظ میں سنجیدہ ہیں اور معاشی ترقی کے ساتھ ساتھ صاف توانائی کا فروغ جاری رکھیں گی۔2019
کی مہم میں کاملا ہیرس نے ماحولیات کی وجہ سے قدرتی گیس کے حصول کیلئے فریکنگ کی مخالفت کی تھی لیکن اب وہ اِس کی حمایت کرتی ہیں کیونکہ فریکنگ کی صنعت بہت زیادہ لوگوں کو ملازمتیں فراہم کرتی ہے۔
