خیبر پختونخوا کے شہر پشاور سے منکی پاکس کا تازہ کیس رپورٹ ہونے کے بعد ملک بھر میں اس بیماری کے شکار ہونے والے افراد کی کل تعداد چار ہو گئی ہے۔
قومی وزارت صحت کے مطابق 29 اگست کو خلیجی ملک سے واپس آنے والے ایک اور پاکستانی شہری میں وائرس کی تصدیق ہوئی ہے۔
ترجمان قومی وزارت صحت نے بتایا ہے کہ گذشتہ روز کراچی سے رپورٹ ہونے والے مشتبہ شخص کا منکی پاکس کا نمونہ منفی آیا ہے، مشتبہ شخص کو بارڈر ہیلتھ سروسز کے عملے نے علیحدہ کیا تھا۔
اتوار کو اپنے ایک بیان میں انہوں نے کہا کہ حالیہ ایم۔پاکس ایمر جینسی کے بعد اب تک پاکستان میں چار کیسز رپورٹ ہوے ہیں۔
وزیراعظم کے کوآرڈی نیٹر برائے صحت ڈاکٹر مختار احمد بھرتھ کے مطابق: ’11 اپریل 2023 کو پاکستان میں منکی پاکس کا پہلا کیس سامنے آیا تھا۔
پاکستان میں منکی پاکس کا دوسرا کیس 23 اگست کو پشاور ایئرپورٹ پر سامنے آیا تھا جبکہ تیسرا کیس 31 اگست کو رپورٹ ہوا تھا۔
یاد رہے کہ 15 اگست کو عالمی ادارہ صحت نے وائرس کی نئی قسم کلیڈ 1 بی کی تشخیص اور ڈیموکریٹک ریپبلک آف کانگو سے کیسز قریبی ممالک میں پھیلنے کے بعد ایمرجنسی الرٹ جاری کیا تھا۔
جنوری 2023 میں وبا کے شروع ہونے کے بعد سے کانگو میں 27 ہزار کیسز رپورٹ ہونے کے ساتھ ساتھ بچوں سمیت 1100 سے زیادہ لوگ جان سے جا چکے ہیں۔
سوئیڈن اور تھائی لینڈ میں اب تک کلیڈ 1بی کی مختلف اقسام میں سے ایک، ایک کیس کی تصدیق ہوئی ہے جس سے براعظم افریقہ کے باہر وائرس کے پھیلنے کی تصدیق ہوئی تھی۔
