ایران میں کوئلے کی کان میں دھماکہ، 28 افراد ہلاک

ایران کے جنوبی خراسان صوبے میں کوئلے کی کان میں گیس کے دھماکے کے نتیجے میں 28 افراد ہلاک اور 17 زخمی ہو گئے ہیں

حکام کے مطابق واقعے کے بعد سے 24 افراد تاحال لاپتہ ہیں۔

ایران کے سرکاری ٹی وی چینل نے اتوار کو بتایا کہ حادثہ مدانجو کمپنی کے زیرِ انتظام کان کے دو بلاکس میں میتھین گیس کے دھماکے سے پیش آیا۔

دھماکے کے وقت بلاکس میں 69 کان کن موجود تھے۔

سرکاری ٹی وی نے ایران کے ہلاک احمر کے سربراہ کا حوالہ دیتے ہوئے کہا کہ 17 زخمیوں کو اسپتال منتقل کیا گیا ہے اور 24 افراد تاحال لاپتہ ہیں۔

ایرانی صدر مسعود پزشکیان نے متاثرہ خاندانوں سے تعزیت کرتے ہوئے کہا کہ ’میں نے وزراء سے بات کی ہے اور ہم تحقیقات کریں گے۔‘