پاکستان کرکٹ ٹیم کے سلیکٹرز نے انگلینڈ کے خلاف ملتان میں ہونے والے پہلے ٹیسٹ کے لیے 15 کھلاڑیوں پر مشتمل اسکواڈ کا اعلان کردیا۔
سیریز کے لئے شان مسعود کو کپتان برقرار رکھا گیا ہے
اسکواڈ میں شامل سعود شکیل ٹیم کے نائب کپتان ہوں گے
دیگر کھلاڑیوں میں عبداللہ شفیق، بابر اعظم، محمد ہریرہ، محمد رضوان (وکٹ کیپر) صائم ایوب، سلمان علی آغا، سرفراز احمد (وکٹ کیپر)، شاہین شاہ آفریدی، ابرار احمد، میر حمزہ اور نسیم شاہ شامل ہیں
اسکواڈ میں 15 ٹیسٹ میچوں میں 47 وکٹیں لینے والے اسپنر نعمان علی کو انجری کا شکار خرم شہزاد کی جگہ شامل کیا گیا ہے جبکہ انجری سے صحتیاب ہونے کے بعد آل راؤنڈر عامر جمال کو بھی ٹیم میں شامل کر لیا گیا ہے۔
اسکواڈ سے کامران غلام اور محمد علی کو ڈراپ کردیا گیا جو بنگلہ دیش کےخلاف سیریز میں اسکواڈ کا حصہ تھے اور انہیں تین اکتوبر سے شروع ہونے والے پریذیڈنٹ کپ میں اپنی ٹیموں کی نمائندگی جاری رکھنے کا مشورہ دیا گیا ہے۔
پاکستان اور انگلینڈ کے درمیان تین ٹیسٹ میچوں کی سیریز کا پہلا میچ ملتان میں 7 سے 11 اکتوبر تک کھیلا جائے گا
اسکواڈ کے اعلان کے بعد ہیڈ کوچ جیسن گلیسپی کی تجویز پر منتخب کھلاڑیوں کو چیمپئنز ون ڈے کپ کے پلے آف سے دستبردار کرا لیا گیا ہے تاکہ انہیں سیریز سے قبل کچھ آرام مل سکے اور کسی انجری سے بھی محفوظ رہیں۔
اسکواڈ پیر 30 ستمبر کو ملتان میں جمع ہو گا جبکہ ٹیسٹ اسکواڈ کا تربیتی کیمپ یکم اکتوبر سے شروع ہوگا۔
پاکستان کی ٹیسٹ ٹیم کے ہیڈ کوچ جیسن گلیسپی کا کہنا ہے کہ مصروف ڈومیسٹک اور بین الاقوامی کرکٹ شیڈول کو مدنظر کھرتے ہوئے ہمیں انگلینڈ کے خلاف ٹیسٹ سیریز سے قبل اپنے کھلاڑیوں کو آرام دینے کی ضرورت ہے۔
ان کا کہنا تھا کہ ہم انگلینڈ کے خلاف پاکستان میں سیریز اور اپنے پرجوش شائقین کے سامنے کھیلنے کے لیے شدت سے منتظر ہیں۔
